2008年10月21日星期二

月記....(21-10-2008)

呢排實在太忙,份新工實在太多o野做~
返左呢間公司兩個多星期,暫時都唔錯,公司同事都幾好人,返9:30am放7:00pm,OT都未試過,但我就要日日7點起身搭小巴去SSP再搭234X去荃灣有線大廈,係就係辛苦o的,不過返5 Day就算喇~

不過部門同部門之間似乎就隔膜比較大,有同事返左幾個月都唔識其他部門的人,聽講係話怕太Friend部門之間有利益沖突。

我自己就覺得怪怪地,或者我自己個人比較social,而且做左咁多年o野,年紀又唔細,職場上既o野都睇得開,大家都係打份工,如果真係因為呢樣野而有隔膜就唔太好。

不過anyway PHP實在太有趣,好flexible,幾乎我可以忘卻以前寫.NET時要注重的o野,每天時間都過得幾快。但係手上的PHP工作接近完成,下一個工作回歸ASP.NET/C#,要寫一個CRM System。

有些人問我,你寫開.NET,轉寫PHP好似downgrade左咁wor~
其實我冇咩所謂,只係拎多o的經驗,學多一隻language,自己多條生路行咁解。
而且我唔會一路做Programmer,因為人工有樽頸位,我定必要上SA或PM的位置才有機會人工有20K。

不過呢間公司真係嚇親我,俾左部Intel P45/ Q6600 / 4GB Ram既機我寫program。
我估佢可能係訂唔切,起Server房拎左部機俾我用住先掛,但係唔知點解都好似唔快過我屋企好多(E8400/P35/2GB Ram)。

2008年10月11日星期六

2008東京電玩展SHOW GIRLS寫真282連發!

其實TGS2008 o的Show Girl就唔係話真係靚絕,不過就好過香港咁。

2008東京電玩展SHOW GIRLS寫真282連發!

http://www.mobile01.com/newsdetail.php?id=6340

強積金蝕左我幾萬銀

以前就話[有強姦,冇焗賭],政府搞個MPF,話就話幫人儲蓄,安享晚年,拎晒全香港打工仔既錢,去養班基金佬,拎晒o的錢去所謂投資,咁樣迫人投資法,同焗賭有乜分別?
安享晚年係佢地o的基金經紀,唔係我地。

MPF最終目的就係唔想再有咁多人問政府拎錢(如綜緩),減少開支。
但係Manulife由年初到9月,我50% 保本/50%高風險,其實自2001年我開始打工要供MPF至今,已經蝕左我三萬幾銀(看下圖),我自己買股票都冇蝕得咁勁,究竟o的錢投資左去邊???
我9月時,雷曼未執已經轉晒100%保本,如果唔係我估蝕夠8成都仲得。

呢幾日,原來對政府,夠惡夠多人一樣得,雷曼班人白紙黑字簽晒紙蝕左都話要拎返十成本金,MPF係大部份香港人都蝕,就算保本都蝕,但係就唔明點解冇人話遊行。我覺得MPF蝕到咁,仲慘過自己拎去賭,政府至要包底。

最慘係,你做得越耐,MPF果舊錢就越大,蝕既話自然就越多,當然賺都係越多,但係其實好多人都唔係話要必賺,直頭就唔想供。

就算搵工都有影響喇,明明我自己本身想搵萬六一個月, 就係因為要預埋要供MPF,要搵萬七,咁起老細角度,佢又要出一份,支出高左,到我手既人工自然又低o的。

2008年10月3日星期五

下星期一又返新工...

雖然近期因為雷曼問題,市道好差,匯豐又炒左100人,地產界又話炒人,但係近呢一個星期,反而連續接到三個interview電話,去左其中一份見工,都係Production House,不過佢有埋Hosting,Consultant既業務。

佢公司度眼見應該有20幾人,但係仲有好多空位,個老細話仲請緊人。全部做Web Application,我就轉左主寫PHP,當然同寫ASP.NET/C#相比,打Code冇咁行雲流水,不過都冇所謂喇,其實到左今時今日,寫什麼語言都再沒有所謂,反正都係搵食。

不過個老細都幾Nice,見工時,老細同PM一起in我,佢仲好笑容過個PM,唔講都唔知佢原來係老細。

返工地點就慘喇,起荃灣廣場果頭,朝9:30am晚7:00pm~
好彩係返5日工,人工幾OK~
比以前份工多幾千,但係工作一定再辛苦o的,希望唔洗再搵工喇....

其實睇返Gmail個Sent box,呢幾個月,我大約send左三十幾份CV出去,有得Interview既,真係得6,7份工。
唔計學歷呢o的老問題,可能係我expect既人工over左佢地budget掛...(我Expect 16K的...)

其實呢間公司有兩個好處,第一就係返5日,第二就係可以著casual wear。
不過自此之後又要過朝早7:00am起身既生活.....