2006年8月10日星期四

回到童年 - 青衣長亨村

可能我年紀真係開始大~開始懷舊,想搵返好多唔見左既記憶~

上星期去IVE註冊時,突然想上去長亨村睇下,因為真係冇乜幾可去開果頭。本來諗住去荔景,但係我細個時住既荔景山屋村已經清拆左,係果o的木屋徙置區,而家已經唔可能再見得到,當年我屋企真係窮到喊呀我~

住左長亨村都有差唔多8年,係因為荔景山臨屋區要清拆,房屋署安排我地轉去公屋至有得住。

由細住到大,由乖學到壞,真係有晒我開心同唔開心既時間。
難忘既回憶,返到去果頭,即時感受返多年前既感覺。

長亨村冇乜點變,但睇上去好多地方已經好陳舊。突登去返果時細個小學成日去玩既新華文具店,同老板娘傾計,佢問我全名係乜,我講俾佢聽,佢竟然仲記得我,仲記得我果時起佢度玩四驅車o添!!!所以佢應該係真係仲記得!!!

我忍唔住拎左部手機周圍影相,其實o的村民覺得我好怪,可能會心諗:(又唔係豪宅,公屋有什麼好影?)
o的人係咁望住我,以為我影佢地,不過我都唔理人點睇,影左一o的相。

我以前細細個就係起呢個公園玩架la ~~


以前呢度好多龜...而家得返o的垃圾袋~.~"


呢個係煲臘好地方~細個打乒乓球就係起呢度木台度~~


藍球場以前係俾我地踢波架~但點解連個藍板都冇埋..


以前呢度間唔中都會嘖下水,而家咩都冇。右邊果張,係社區會堂後面,以前應該有部水機,而家冇埋~


細個經常去既呀波羅同7仔同文具舖,竟然仲起度!!!

歷年來最靚!2004 年香港中學會考10A女狀元彭匡怡

呢個女仔果時睇電視已經覺得唔錯~
估唔到事隔兩年真係靚左咁多~

2004年時彭匡怡的新聞片段
http://www.youtube.com/watch?v=RKnHFYSo3UM

近期的相片:
600x800800x600600x800600x800800x600

今年會考零分竟然有20300人~~

今日係放榜大日子,雖然我冇份,會考這玩意亦離開我接近十年,但唔知點解都會好關心。

睇到報紙話十二萬會考生,有25個10A,但有20300人會考零分,佔成差唔多兩成,真係幾嚇人.
參考: 十優狀元25人破紀錄 成績兩極化 2萬人捧蛋2006-08-09

以前經常有人話我:(會考零分,根本冇可能,你亂填MC都有幾分。你係咪交白卷?)
自我畢業後,我一直都答:(係有可能,仲要有溫書,冇亂填,做完到時間至停筆,都係零分。)
最後得到既回應都係潑冷水等等喇。

我相信呢兩萬幾人,都未至於交白卷吧?

今日上左Uwant,香港討論區,香港高登都發現一個現象,就係IVE的確如廣告所講,起好多應屆會考生來說只係一個水泡...

有好多form.5畢業生都不外乎會問:
(死喇,IVE收唔收我?)
(死喇,我得X分IVE收唔收我架?)
(讀XXX出路好唔好架?)
等等...

睇埋內容,好多人揀既科都係百搭,但求就手,易入,唔理自己有冇興趣,報左先。
總之有得讀就叫做完成放榜搵學校既使命。

我好明白會考生低分時既緊張情緒,因為我1999年時,都係會考零分,即使如此,但基於身邊同學同當時心理因素,讀書係我唯一前路,亦未打算咁快出去工作。
所以當年我亦打撞咁去左明愛白英奇,YMCA果o的報讀,乜都報。

但亦因為咁浪費左老豆一萬銀,仲晒左自己差唔多成年時間。
揀讀咩科之前,最好諗下自己係咪真係有興趣。

讀IVE唔同讀中學,讀中學,係冇計,就算自己唔鐘意都要讀,因為就係要會考。

但IVE係就業前或升大學前既訓練同準備,不能馬虎。除非打從心裡想出到社會隨便找份地產經紀就算。

我見有o的女仔揀建築,電子果類後補HD。
老實講,我就真係唔係好信女仔真心想讀呢o的科,只係有位就報咁解。
幾年後出到o黎至知自己唔係做果一行,你張HD其實已經得物無所用,因為根本你唔會做呢行。
等於拎張設計HD去見會計咁解。

所以真係唔好急,諗清楚才決定去讀,如果唔係晒左錢,仲晒左自己時間,始終讀IVE係講緊幾年間既事。

其實我不太願意想見到呢類說話,因為自己未來都係一份子,尊重呢個地方,亦等於尊重自己既未來所得的學歷。