一個中年IT男@香港,得閒就寫下無聊嘢啦~

RSS訂閱

Translate this page

搜尋文章

精選文章

越南富國島遊記 2023 - Day 6 & 7 & 8 - 富國夜市 / 越南國粹村 / 富國大世界

Day 6 第三天吃「 KIẾN–XÂY 」的蝦滑魷魚湯米。 今天是旅程倒數第二天,原本計劃是去那個很出名的「 海星沙灘 」或者「 Sao Beach 」(又名白沙灘和牛奶沙灘) 但這兩個地方很偏僻,海星沙灘是在島的北方,車程一小時,而且幸好爬過文,雨季是沒有海星的,...

細說Street Fighter - 當年打Sheng Long (成龍?昇龍?)的秘密


前幾日見到Jacky Blog有講到Street Fighter本地漫畫一文,即時勾起我童年時的回憶,其實我而家見到Street Fighter 2,同聽到富豪雪糕車既音樂一樣,都會勾起童年時的玩意。

記得我應該在小學五年班(約1990年)的時候已經去機舖打機,當年去廟街的<順利>和<順強>機舖,荃灣就會去<國際>,記得有三間都是叫國際的,當年還有分成人場和兒童場~
或者去荃豐中心樓下間好像叫<668>還是<883>打機,當年還是要媽媽帶我去添~~
如果冇睇錯,現在廟街呢兩間機舖好似都仲起度~

其實SF2 起1991年推出時,當年莫講Internet仲未發達,連電腦都是天價玩意。
什麼是Windows,什麼是上網真是沒有人知。如果要知道遊戲資訊,相信都是看<世嘉一族>或<超任一族>甚至<兒童周刊>...
當年炒得熱鬧既SF1 & 2代傳聞如
  1. 一陽指
  2. 美國拳王果關,昇出條Key去非洲打象定唔知話打非洲土人
  3. 打司令10 Round Draw Game 打成龍
還有很多,相信有部份,我同你都曾經傻傻的去嘗試。

SF1比SF2更早出現<讓Round>,<鬥波>,<鬥升>,<單手chok波>都係出自SF1,而不是SF2。而到SF2出現的軍佬無影撻,黐身,印度佬隱形等等反而令SF2有另一種玩法。
要說起SF1代和2代的傳聞,現在想起都真是回味,因為我當年都是信到十足的。

SF1 傳聞 :
  1. 一陽指 - 傳聞出法係 以Z字型咁在JoyStick度798 => 5=>123 +拳咁出,一招即死。
  2. 打大象 - 打睇鋸佬果關 (即係Sagat呀),打打下會有象行出o黎,一腳踢死Tiger佬,跟住就打象....
  3. 打非洲人 - 傳聞嚮美國總統山(即係有5個人頭既山果關),在某位置使昇龍拳便有鑰匙跌出o黎...(起山度跌條鑰匙出o黎)...跟住就可以坐飛機去地圖上果棵"椰子樹"既非洲打土人....
  4. ps:當年傳得最"恆"就係呢個,好多人都話見過,仲講到似層層又話個土人會飛,仲會叫隻象出o黎咁話....
SF2 傳聞:
  1. 阿RYU個關有塊寫住風林火山的板,如果打爛佢,即時按重拳既話,可以拎塊木板拍人....
  2. 域加有鐵欄果關,傳聞用春麗唔知點樣跳,會跳左入欄同域加打。
其實記憶中仲有好多,我真係唔記得左,大家不妨留言講我知....

最後當然要提一提Sheng Long呢個角色喇!
事源起1992年,有一本叫Electronic Gaming Monthly既Game書,圖文並茂咁登左RYU對Sheng Long的報導,本來要人信真係難,因為當年報導係起4月,亦有人話係愚人節的笑話,但無奈Capcom本身設定亦有"Sheng Long"呢個名, 在打司令時,司令會彈左一句:("You must defeat Sheng Long to stand a chance." ) , 所以令到好多人都相信真係有呢個電腦角色. 而出現方法傳聞有兩個,第一係打司令時,10 Round Draw Game,第二係10 Round 內唔可以掂司令 (佢打到你,你擋左都唔得).....當年真係有人去試的~而果時好多人都話:(嘩~我打過呀,好勁架) /(我見過呀,仲好多人圍觀呀)

不但在香港試既人多,吹水話見過既人更多,起以訛傳訛之下, 起外國都好多人中招,所以EGM雜誌,不得澄清,只係開下玩笑. 而網絡上更有記載呢次事件. 起名為"EGM April Fool's Jokes" 亦有不少網站有記錄到現在.右圖就係當年起風波既雜誌頁喇!我搵左好耐,真係難得一見架~當年沒想過什麼是合成照吧~~

Pictureshenglongegmscan.jpg

直到SF3代, Sheng Long 風波再起,改圖品質上升,真係看似係真,但無奈地可能機迷一般都記得SF2既經驗,所以不是太多人相信.


到最後M.U.G.E.N亦完成大家多年o黎既心願,將Sheng Long呢個角力真實化.



而到最最最後Capcom終於都在Super Street Fighter 4,官方地加入這個人物了 - 剛拳

0 comments:

發佈留言

『千金易得,知音難求,感謝你看到最後。』. 由 Blogger 提供.