2006年7月13日星期四

岩岩去完青衣IVE Interview完

岩岩去完青衣IVE Interview,由於我細個住青衣長亨村都有7,8年,所以搵就唔係好難搵,都係經美景花園行去。
不過今日真係超熱,成33度呀~

去到IVE門口,我原本仲諗住會有一個Reception既物體,或者起碼都有一個詢問處。
點知一上到去就見到塊地圖版同一個廁所....可能放左學,人影都唔多隻...
仲要熱到我全身都濕晒tim...

跟住見到一個著住工衣既大叔,我問佢詢問處起邊,佢又問返我咩學系,我話電腦,佢話唔知起邊,指住塊地圖板叫我自己睇...
跟住睇果塊版,知道電腦部門係起三樓,一路行樓梯上去,行行下我見就見到呀,不過佢又寫住咩教員室又校長室咁樣,咁以我傳統既中學學生思想,教員室係唔俾入架ma,緊係唔會推門喇...

沿途三層都唔見有人...跟住上埋四樓諗住睇下有冇人幫拖喇,見到一名樣兒娟好的女同學,我問佢知唔知電腦系係起邊上堂,佢一句就答唔知...

蕩下蕩下...再見到一個應該係IVE員工的女子,我再問佢,佢反問我係咪見工.....

我話:(唔係呀,我報左HD,有人叫我o黎Interview。)
咁佢都好好人呀,竟然推門帶我經過教員室(!?)....去返三樓....再去到一個詢問處...

轉個靚彎去到真正MIT既詢問處,叫我坐住等。

有一個叫張Sir既人In我,我自己雖然見工唔係真係太多,但係就唔會好怕Interview。

之前上網睇有人話咩小組討論方式去Interview,仲話要用英文介紹自己,都唔係既,都係單對單。

我準備左好多之前既作品,諗住當見工咁見,點知佢問都冇問過,睇都未睇過。
只係問我可以一星期返幾多日學,放工放幾點,講解我知個HD係讀乜,同埋了解我對Programming認識有幾深。

佢問我既野,我都冇咩大問題。 都叫做有講有笑,張Sir都幾好人架。
佢話我可能仲熟過佢(佢講笑架o者),成個過程20mins左右,跟住佢就急急腳咁走左去,連ByeBye我都冇機會講..

佢話叫我等一至兩星期...In完至三點幾,出左去油麻地Gamezone打機,見到母校-循道中學,真係好懷念讀書果時既日子。
亦回想返,當年既自己點都冇諗過,多年後既今日會有機會"咩"返個書包。
間中學靚左好多,亦好懷念以前經常跟同學仔偷偷地著校服落GameZone打機的日子。

當年我只有15,16歲,雖然每天都係袋住六,七十蚊,但真係好開心。其實好想返母校,但佢地未必會歡迎我呢個壞學生了。

不過順便起度提一提,等日後有意報IVE既人知道。
雖然IVE網頁上寫話如果一星期返 4日,最快可以兩年讀完,但原來唔係真係個個星期都返足4日,佢話可能兩日,可能三日,因為未真正開學其實仲未知道個日程係點咁話。要到真正開課,睇返個日程表至會知。

沒有留言:

發佈留言